நீங்கள் தேடியது "களக்காடு புலிகள் காப்பகம்"

களக்காடு:

களக்காடு புலிகள் காப்பகத்திற்கு உட்பட்ட அப்பர் கோதையாறு, களக்காடு, திருக்குறுங்குடி வன சரகங்களில் புலிகள் மற்றும் வனவிலங்குகள் கணக்கெடுப்பு பணிகள் நேற்று தொடங்கியது. களக்காடு புலிகள் காப்பக கள இயக்குனர் அன்வர்தீன் உத்தரவின் பேரில் துணை இயக்குனர் ஆரோக்கியராஜ் சேவியர் பணிகளை தொடங்கி வைத்தார். வரும் 18-ம் தேதி வரை பணி நடக்கிறது.

இதில் கல்லூரி மாணவர்கள், இயற்கை நல ஆர்வலர்கள், வனத்துறை ஊழியர்கள் 100 பேர் ஈடுபட்டுள்ளனர். அப்பர்கோதையாறு வனசரகத்தில் 5 குழுவினரும், களக்காடு, திருக்குறுங்குடி வனசரகங்களில் தலா 8 குழுவினரும் என மொத்தம் 21 குழுவினர் வனப்பகுதியில் கணக்கெடுப்பு நடத்தி வருகின்றனர்.

முதல் 3 நாட்கள் புலி, சிறுத்தை மற்றும் பிற மாமிச உண்ணிகள் குறித்தும், அடுத்த 3 நாட்கள் குளம்பினங்கள் குறித்தும், கணக்கெடுப்பு நடத்துகின்றனர். வன சரக அலுவலர்கள் களக்காடு புகழேந்தி, திருக்குறுங்குடி கமலக்கண்ணன், அப்பர்கோதையாறு பாலாஜி ஆகியோர் கணக்கெடுப்பு பணிகளை ஆய்வு செய்தனர். கணக்கெடுப்பின் போது செங்கல்தேரி வனப்பகுதியில் புலிகளின் கால்தடங்கள், எச்சங்கள் கிடைத்துள்ளன.

களக்காடு:

நெல்லை மாவட்டம் களக்காடு மேற்கு தொடர்ச்சி மலையில் 895 சதுர கிலோ மீட்டர் பரப்பளவில் களக்காடு, முண்டந்துறை புலிகள் காப்பகம் அமைக்கப்பட்டுள்ளது. தமிழகத்தின் முதல் புலிகள் காப்பகம் என்ற பெருமையை பெற்ற இந்த காப்பக வனப்பகுதியில் புலி, சிறுத்தை, யானை, கரடி, சிங்கவால்குரங்கு, செந்நாய்கள், நீலகிரி வரையாடு, கடமான் உள்ளிட்ட அரியவகை விலங்கினங்கள் வசிக்கின்றன.

இதுபோல மூலிகை செடிகளும் உள்ளன. ஆண்டு தோறும் மலையில் வாழும் வனவிலங்குகள் குறித்து கணக்கெடுப்பு பணி நடைபெறுவது வழக்கம். இதன்படி நடப்பாண்டு பருவ மழைக்கு முந்தைய கணக்கெடுப்பு பணி இன்று (11-ந் தேதி) தொடங்கியது.

இதையொட்டி கணக்கெடுப்பு பணியில் ஈடுபடும் கல்லூரி மாணவர்கள், இயற்கை நல ஆர்வலர்கள், வனத்துறையினருக்கு நேற்று களக்காடு தலையணையில் பயிற்சி முகாம் நடத்தப்பட்டது. ஆராய்ச்சியாளர் ஸ்ரீதர் கணக்கெடுப்பு நடத்துவது குறித்து பயிற்சி அளித்தார். கணக்கெடுப்பு குழுவினருக்கு மருந்து, மாத்திரைகள், உணவு தயாரிக்க சமையல் பொருட்கள் உள்பட 22 வகையான உபகரணங்கள் வழங்கப்பட்டன.

பயிற்சி முடிந்ததும் நேற்று மாலையில் கணக்கெடுப்பு குழுவினர் அவர்களுக்கென ஒதுக்கப்பட்ட வனப்பகுதிகளுக்குள் அனுப்பி வைக்கப்பட்டனர். இன்று அதிகாலையில் அவர்கள் கணக்கெடுப்பு பணிகளை தொடங்கினர். களக்காடு புலிகள் காப்பக கள இயக்குனர் அன்வர்தீன் உத்தரவின் படி துணை இயக்குனர் ஆரோக்கிய ராஜ் சேவியர் கணக்கெடுப்பை தொடங்கி வைத்தார். களக்காடு புலிகள் காப்பகத்திற்குட்பட்ட அப்பர் கோதையாறு, களக்காடு, திருக்குறுங்குடி வன சரகங்களில் 21 இடங்களில் கணக்கெடுப்பு நடந்து வருகிறது. இதில் கல்லூரி மாணவர்கள், இயற்கை நல ஆர்வலர்கள், வனத்துறை ஊழியர்கள் 100 பேர் கலந்து கொண்டுள்ளனர். அப்பர் கோதையாறு வனசரகத்தில் 5 குழுவினரும், களக்காடு, திருக்குறுங்குடி வனசரகங்களில் தலா 8 குழுவினரும் என மொத்தம் 21 குழுவினர் புலிகளை நேரில் காண்பது, அவைகளின் கால்தடங்கள், எச்சங்களை சேகரிப்பது, மற்றும் அடையாளங்களை கண்டெடுத்தல் முறைகளில் கணக்கெடுப்பு நடத்தி வருகின்றனர்.

வருகிற 17-ந் தேதி மாலை வரை அவர்கள் அடர்ந்த வனப்பகுதியில் தங்கியிருந்து இப்பணியில் ஈடுபடுகின்றனர். முதல் 3 நாட்கள் புலி, சிறுத்தை மற்றும் பிற மாமிச உண்ணிகள் குறித்தும், அடுத்த 3 நாட்கள் குளம்பினங்களின் நடமாட்டம் குறித்தும், கணக்கெடுப்பு நடத்துகின்றனர். பின்னர் 7-ம் நாள் சேகரித்த புள்ளி விபரங்களை அறிக்கையாக தயார் செய்கின்றனர். பின்னர் 8-ம் நாள் அறிக்கைகளையும், சேகரிக்கப்பட்ட வனவிலங்குகளின் கால்தடங்கள், எச்சங்களை அதிகாரிகளிடம் சமர்பிக்கின்றனர்.

வனவிலங்குகள் கணக்கெடுப்பு பணியால் திருக்குறுங்குடி மேற்கு தொடர்ச்சி மலையில் உள்ள திருமலைநம்பி கோவிலுக்கு செல்ல நேற்று முதல் பக்தர்கள் மற்றும் சுற்றுலா பயணிகளுக்கு தடை விதிக்கப்பட்டுள்ளது.

இதேபோல பாபநாசம் முண்டந்துறை புலிகள் சரணாலய பகுதி, மணிமுத்தாறு மலைப்பகுதியிலும் புலிகள் கணக்கெடுக்கும் பணி இன்று தொடங்கியது. அம்பை வனச்சரக வனவர் முருகேசன் தலைமையில் வனத்துறையினர் மற்றும் மாணவர்கள் இந்த பணியில் ஈடுபட்டார்கள்.

களக்காடு புலிகள் காப்பகத்திற்குட்பட்ட மேல் கோதையாறு சரகத்தில் உள்ள சின்ன குட்டியாறு அணை வனப்பகுதியில் சுற்றுலா பயணிகள் செல்ல வனத்துறையினர் தடை விதித்துள்ளனர். இந்த நிலையில் தடையை மீறி சிலர் அப்பகுதிக்கு சென்றதாக கிடைத்த தகவலின் பேரில் மேல்கோதையாறு வனசரகர் (பொறுப்பு) புகழேந்தி தலைமையிலான வனத்துறையினர் சென்று ஆய்வில் ஈடுபட்டனர்.

அப்போது அப்பகுதியில் நுழைந்த வீ.கே.புரத்தை சேர்ந்த மரிய அந்தோணி (வயது 57) அவரது உறவினர் சென்னையை சேர்ந்த வக்கீல் பிரின்ஸ் (30) உள்பட 12 பேரை கைது செய்தனர். அதனைதொடர்ந்து தலைமை வன பாதுகாவலரும், களக்காடு புலிகள் காப்பக கள இயக்குனருமான (பொறுப்பு) டிங்கர் குமார் உத்தரவின் பேரில், களக்காடு துணை இயக்குனரும், வன உயிரின காப்பாளருமான ஆரோக்கியராஜ் சேவியர் ஆலோசனையின் படி 12 பேருக்கும் ரூ.5 ஆயிரம் அபராதம் விதிக்கப்பட்டது. அவர்கள் அபராத தொகையை செலுத்திய பின்னர் அங்கிருந்து வெளியேற்றப்பட்டனர்.

அவர்கள் தடை செய்யப்பட்ட பகுதிக்கு செல்ல அப்பகுதியில் உள்ள வனத்துறை சோதனை சாவடியில் பணிபுரிந்து வந்த வன ஊழியர்கள் உடந்தையாக இருந்ததாக கூறப்படுகிறது.

அவர்கள் மீது துறை ரீதியான நடவடிக்கை எடுக்கப்பட்டு வருவதாக அதிகாரிகள் தெரிவித்தனர். புலிகள் காப்பகத்தில் தடைச் செய்யப்பட்ட வனப்பகுதிக்குள் அத்துமீறி நுழைபவர்கள் மீது வன உயிரின பாதுகாப்பு சட்டத்தின் படி கடும் நடவடிக்கை எடுக்கப்படும் என்று களக்காடு துணை இயக்குனரும், வன உயிரின காப்பாளருமான ஆரோக்கியராஜ் சேவியர் எச்சரிக்கை விடுத்துள்ளார்.